Llawenydd Graddio i’r Rheolwraig Tracy

29 Hydref 2010

Tracy Hague
BSc (Anrh) Astudiaethau Tai
Erddig, Wrecsam

Mae Tracy Hague wedi bod yn rheolwraig Tai yng Nghyngor Bwrdeistref Sirol Wrecsam ers y 10 mlynedd diwethaf ac mae’n credu fod astudio’r cyrsiau Tai ym Mhrifysgol Glyndŵr wedi bod yn ddefnyddiol iawn i’w gyrfa.

Meddai: “Dechreuais ar y cwrs Tai HNC 5 mlynedd yn ôl ac rwyf wedi gweithio fy ffordd trwy’r cymwysterau, hyd at lefel gradd.
“Mae’r cyrsiau yn waith caled, yn enwedig â minnau yn gweithio yn llawn amser a theulu gennyf i ofalu amdanynt hefyd, ond cefais lawer o gefnogaeth gan fy nheulu a’m cydweithwyr, ac roedd hynny’n help garw. Maen nhw i gyd yn falch iawn ohona’i.

“Roedd pwnc fy nhraethawd hir yn gysylltiedig â’m prosiect presennol yn y gwaith, felly roedd hynny yn ei wneud yn ddiddorol ac yn werth chweil. Rydw i’n sicr wedi gweld y budd o ddiweddaru fy ngwybodaeth, gan fod hyn wedi fy helpu i symud ymlaen ac ymgymryd â meysydd gwaith newydd.

"Mae’r cyrsiau hefyd wedi rhoi cyfle gwych i mi rwydweithio gyda phobl sy’n gwneud swyddi tebyg mewn cynghorau eraill ledled y wlad, ac mae hynny wedi bod yn werthfawr.

“Hoffwn ddiolch yn arbennig i’m darlithydd, Jane Richardson, am ei chefnogaeth. Mae ei gwybodaeth gyfredol a’i phroffesiynoldeb heb eu hail.”