Text begins here:
Sut i wneud cais am lety
Gyda system cais am lety ar-lein newydd Prifysgol Glyndŵr, mae gwneud cais am lety yn hawdd a chyflym. Defnyddiwch y system ar-lein pan fyddwch wedi penderfynu pa lety yr hoffech fyw ynddo.
Cyn i chi gwblhau cais am lety, byddai’n syniad i chi ddarllen Telerau ac Amodau Deiliadaeth a’r Telerau ac Amodau Ariannol.
Dylech ddarllen y telerau a’r amodau hyn er mwyn deall y Polisi Dyrannu y mae’r tîm Llety yn ei ddilyn wrth neilltuo llety i fyfyrwyr.
Mae’r ddogfen hon hefyd yn manylu’r Drefn Neilltuo ac yn dangos, gam wrth gam, y broses y mae’r tîm llety yn mynd trwyddi wrth neilltuo llety i fyfyrwyr. Y mae hefyd yn cynnwys gwybodaeth sy’n benodol berthnasol i fyfyrwyr rhyngwladol.
Polisi neilltuo – amcanion y polisi
Yn anffodus, gan bod ein hystafelloedd mor boblogaidd, nid oes lle i bawb sy’n gwneud cais. Gan hynny rydym yn dilyn system sy’n rhoi ein hystafelloedd i’r rheiny sydd eu hangen fwyaf. Mae hyn yn golygu y rhoddir blaenoriaeth i fyfyrwyr sydd:
- Yn eu blwyddyn gyntaf o astudio
- Ar gwrs llawn amser ym Mhrifysgol Glyndŵr
- Erioed wedi bod ym Mhrifysgol Glyndŵr o’r blaen
- Yn byw yn rhy bell i ffwrdd i allu dod o hyd i lety preifat ar rent
- Ag anghenion cymdeithasol a/neu gorfforol penodol
Gall myfyrwyr sy’n dychwelyd wneud cais am lety prifysgol mewn unrhyw ystafelloedd dros ben a allai fod ar gael.
Myfyrwyr sy’n rhieni, cyplau, teuluoedd
Yn anffodus, nid yw ein neuaddau preswyl yn cynnig unrhyw lety sy’n addas ar gyfer teuluoedd, cyplau neu fyfyrwyr sy’n rhieni. Mae’n bosibl y gallai’r tîm llety helpu i ddod o hyd i lety lleol amgen.
Myfyrwyr Erasmus a myfywyr semester
Rydym yn neilltuo canran fechan o’n hystafelloedd i fyfyrwyr Erasmus a myfyrwyr sydd angen lle am un semester yn unig. Rydym yn rhoi blaenoriaeth i’r myfyrwyr hynny sy’n byw bellaf i ffwrdd o Wrecsam.
Anabledd a gofynion arbennig
Byddwn yn cynnig eich dewis cyntaf o lety mewn neuadd i chi os:
- Oes gennych anabledd sy’n effeithio ar eich gofynion llety
- Byddwch yn cwblhau’r ffurflen gais ar-lein erbyn canol Mehefin
- Ydych wedi nodi eich cyflwr meddygol neu ofynion arbennig yn adran Dewisiadau Personol y ffurflen gais ar-lein
Byddwn hefyd yn sicrhau lle i chi mewn neuadd trwy gydol eich astudiaethau, er ei bod yn bosibl y bydd angen gweld tystysgrif feddygol arnom.
Pe bai’n well gennych gael llety yn y sector preifat, mae’n bosibl y gallwn gael gwybodaeth am landlordiaid addas. Ceir mwy o wybodaeth am hyn gan y Gwasanaethau Myfyrwyr hefyd.
Rhestr aros
Os na chynigir y llety y gwnaethoch gais amdano i chi, fe’ch ychwanegir at ein rhestr aros yn awtomatig.
Y Drefn Neilltuo
Rydym yn sylweddoli fod y Drefn Neilltuo yn gallu ymddangos yn hir a chymhleth, felly dyma gynnwys canllaw byr i’r broses o wneud cais am lety isod.
Chwefror / Mawrth / Ebrill / Mai
- Os ydych wedi derbyn cynnig lle pendant ar gwrs Prifysgol Glyndŵr ac angen llety arnoch, bydd angen i chi gofrestru cyfrif ar y system ar-lein ac yna cwblhau’r ffurflen gais ar-lein.
Mehefin / Gorffennaf
- Os ydych yn fyfyriwr israddedig o’r DU/UE gyda chynnig amodol neu ddiamod, bydd angen i chi gwblhau’r ffurflen gais ar-lein erbyn 10 Mehefin 2012 er mwyn bod yn sicr o gael ystafell
- Os byddwch yn llwyddiannus, anfonir e-gytundeb atoch yn ystod Gorffennaf. Yna, bydd yn rhaid i’r cytundeb gael ei dderbyn o fewn 14 diwrnod ynghyd â’r blaendal o £250 i gadarnhau’r ystafell
- Unwaith i ni dderbyn cadarnhad eich bod wedi derbyn eich e-gytundeb ac wedi talu’r blaendal o £250, bydd angen i chi gwblhau’r broses e-ymsefydlu ac e-gyrraedd ar-lein. Yma, byddwch yn mynd trwy gyflwyniad ymsefydlu gyda gwybodaeth ddefnyddiol am fyw yn eich llety ac yn nodi pa bryd y byddwch yn dod i’ch llety
- Ceir y swm sydd angen i chi ei dalu am eich ffioedd llety ar dudalen derbyn cytundeb eich e-gytundeb. (Gellir talu’r ffioedd llety naill ai mewn un cyfandaliad neu 3 taliad cylchol â cherdyn)
Awst
- Os ydych yn fyfyriwr israddedig neu uwchraddedig rhyngwladol newydd gyda chynnig amodol neu ddiamod, bydd angen i chi gwblhau’r ffurflen gais ar-lein erbyn 27 Awst 2012 er mwyn bod yn sicr o gael ystafell
- Bydd ffurflenni cais ar-lein a gwblhawyd ar ôl canol Awst yn cael eu hystyried ar gyfer unrhyw ystafelloedd sydd gennym ar ôl yn y neuaddau
- Os ydych yn fyfyriwr Clirio, bydd angen i chi gysylltu â’r tîm llety i archebu llety trwy broses wahanol
- Os ydych wedi methu cael ystafell mewn neuadd, byddwn yn eich helpu i ddod o hyd i lety yn y sector preifat
- Os oedd eich lle yn amodol ar ganlyniadau a chithau heb gael y graddau, bydd angen i chi wneud cais i ni am ad-daliad o’r blaendal o £250
Medi
- Mae’r cyfnod trwydded yn dechrau a myfyrwyr yn cyrraedd Prifysgol Glyndŵr. Byddwn yma i’ch croesawu a’ch helpu i setlo
- Wrth gyrraedd, byddwch yn derbyn pecyn croeso a chopi o’ch llawlyfr preswylwyr
- Os nad ydych yn fodlon gyda’ch ystafell, byddwn yn derbyn ceisiadau i symud/cyfnewid ystafell a’u cydlynu os yn bosibl
|
