Gwobr Goffa er anrhydedd myfyrwraig nyrsio

Mae darlithwyr nyrsio ym Mhrifysgol Glyndŵr wedi talu teyrnged i fyfyrwraig ymroddedig a fu farw 19 mis yn unig ar ôl iddi gychwyn ar ei chwrs gradd trwy roi gwobr yn ei henw. 

Roedd Sylvia Crowe, o Tan-y-fron, Wrecsam, yn astudio ar raglen nyrsio BN (Anrh) y Brifysgol pan gollodd ei brwydr yn erbyn salwch byr ym mis Tachwedd 2007.

Er anrhydedd i frwdfrydedd ac ymroddiad Sylvia i nyrsio, sefydlodd y staff Wobr Goffa Sylvia Crowe ar gyfer y garfan ddiweddaraf o raddedigion nyrsio, a fyddai wedi rhannu eu dathliadau gyda hi.

Meddai Pam Hope, Arweinydd Pwnc ar gyfer Astudiaethau Iechyd: “Roedd Sylvia yn awyddus iawn i fod yn nyrs. Brwydrodd yn erbyn adfyd er mwyn cael lle ar y rhaglen ac roedd yn awyddus iawn i gwblhau ei hastudiaethau.

"Brwydrodd Sylvia yn galed iawn dros yr hyn yr oedd hi’n ei gredu ynddo, ac rydym yn anrhydeddu’r ymroddiad a’r ymrwymiad yma i fod yn nyrs.”

Gill Campbell, Uwch Ddarlithwraig mewn Nyrsio, oedd tiwtor personol Sylvia. Meddai: “I lawer o’n myfyrwyr, dyma oedd y tro cyntaf iddyn nhw golli ffrind ac roedd marwolaeth Sylvia yn andros o sioc iddyn nhw i gyd.

"Roedd arnom ni eisiau ei chofio gyda gwobr i fyfyriwr oedd yn rhannu ymroddiad ac ymrwymiad Sylvia i nyrsio.”

Dyfarnwyd y Wobr Goffa Sylvia Crowe gyntaf i Mark Quilter, o Abergele, oedd yn astudio BN (Anrh) Nyrsio Arbenigedd mewn Oedolion.

“Teimlais gymysgedd o emosiynau wrth dderbyn y wobr, gyda’r hapusrwydd o raddio yn gymysg â’r tristwch o golli ffrind,” meddai Mark, sy’n gweithio yn yr Uned Feddygol Ddwys yn Ysbyty Glan Clwyd.

Dywedodd Pam fod Mark yn rhannu’r un brwdfrydedd dros nyrsio â Sylvia ac yn sefyll allan ymhlith holl fyfyrwyr nyrsio y Brifysgol pan ddaeth i ddyfarnu’r wobr.

Ychwanegodd: “Roedd Mark yn ddewis amlwg. Y mae’n bendant yn chwaraewr tîm, yn arweinydd naturiol ond yn rhywun sy’n arwain trwy enghraifft ac yn ysbrydoliaeth i’w gyd-fyfyrwyr ac i’r staff addysgu.” 

Meddai Mark: “Mae’n wych cael cydnabyddiaeth trwy’r wobr yma ac mae clywed fy mod yn ysbrydoliaeth i’r criw i gyd wedi fy ngwneud i’n falch iawn ac wedi rhoi hwb ychwanegol o hyder i mi.”

Mae Mark, a fu’n gweithio fel diddanwr plant cyn penderfynu hyfforddi fel nyrs dair blynedd yn ôl, yn gobeithio mynd ymlaen i gael cymwysterau arbenigol i weithio fel nyrs ardal yn y dyfodol.